Peunjata



Bismillahirrahmanirrahim

Ukeuë bansa droë, bansa bansa dônja dan badum organisasi internasional


Kamoë nibak Komité Peukeumah Atjèh Meurdéhka Demokratik, deungon njoë teupeunjata bahwa kamoë akan meusambông peurdjuangan di tanoh éndatu kamoë deungon tjara tjara njang leubèh demokratik, seusuai deungon hukôm dan atôran atôran dônja.

Kamoë angkèë bahwa na tjit hai hai njang djroh nibak peurdjandjian MoU njang geutèkèn uléh Geurakan Atjèh Meurdéhka (GAM) dimijub pimpinan Malik Mahmud dan waki waki dari Indonesia di Helsinki bak uroë 15 Agustus 2005, dalam peukara peukureuëng tingkat kekerasan di Atjèh. Bahpih meunan, proses atawa tjara tjara njang geungui bak peulahé peurdjandjian njan hana teubuka dan kon seutjara demokratik.

Bahthatpih le permintaan nibak pihak pihak di Atjèh, rôh tjit disinan anggèëta GAM keudroë dan masyarakat sipil, untôk tjok bagian dalam proses njan supaja djeuët geubri pikéran geuh, teutapi bandum permintaan njan hana geupeupunoh. Peuë njang teudjadi nakeuh, tjit padum padum droë sagai njang ka meusaréng dan rôh teulibat u dalam njan.

Dalam arti politék dan demokrasi, proses dan hasé nibak peurdjandjian MoU njan nakeuh buët hana panjang piké, meudhab-dhab dan asai meu kalheuëh mantong; seutjara moral, buët njan hana pat peubeuna; dan akibatdjih hana keumah peutheun untôk djangka panjang.

Kamoë peudjuang peudjuang seutia Atjèh Meurdèhka ka meutjok saboh peunutôh meupeusaboh droë dan meupeudong saboh Komité njang tudjuan djih nakeuh: sambông keulai peurdjuangan keumeurdéhkaan; peugisa keulai dèëlat Neugara Atjèh; peukeumah lapak untôk peudong saboh peumeurintahan Atjèh Meurdéhka njang demokrasi dan seudia forum keu su majoritèt rakjat Atjèh njang seulama njoë hana soë padôli. Kamoë akan peudjak tudjuan tudjuan njoë bandum demi bansa dan nanggroë Atjèh, supaja bansa Atjèh keumah duëk santeut bahô deungon bansa bansa laén lam dônja untôk saban saban tapeudjuang keu saboh perdamain dônja, HAM, kebebasan, keadilan dan demokrasi.

Kamoë peutjaja bahwa hana alasan sapeuë pih keu kamoë untôk hana meusambông lé peurdjuangan njoë. Aspirasi dan tjita tjita bansa Atjèh ka trang that meutuléh dalam proklamasi Atjèh Meurdéhka 4 Désèmber 1976; bandum njan ka meupheuët dan meu uké dalam tiëp tiëp ulèë ureuëng Atjèh, khusus djih keu sjèëdara sjèëdara njang hana pijôh pijôh geupeudjuang keu tjita tjita sutji njoë.

Deungon njoë kamoë tawôk bak bandum bansa Atjèh, pat mantong ateuëh rhuëng dônja njoë, supaja geubeudoh bandum meusigo dan peusaboh droë dalam saboh baréhsan njang kong, demi untôk tareubôt keulai dèëlat bansa, dèëlat Neugara Atjèh dan tapeugisa keulai maruwah dan keumuliaan droëteuh. Untôk ta puga buët rajek dan ta atô keulai peurdjuangan njoë, kamoë ka meupeudong saboh Komité Peukeumah Atjèh Meurdéhka Demokratik untôk tjok langkah langkah njang tapeureulèë dalam ôsaha geutanjoë bak ta teumeung tudjuan keuneulheuëh.




New York, 15 Djanuari, 2006


Kamoë nibak Komité Peukeumah Atjèh Meurdéhka Demokratik





1. Affan Madjid (Acheh, Pereulak)
2. Aiman Zulkarnaen (Malaysia)
3. Amir Tereusep (Acheh Rayek)
4. Amirul Mu'minin Nya' Tjut Ali (Acheh)
5. Arifin Amin Syech (Australia)
6. Asnawi Ali (Sweden)
7. Eddy L. Suheri (United States)
8. Fuadi Azmi (South Africa)
9. Ghazali Abdul Hamid (Malaysia)
10. Guree Rahman Ismail (Sweden)
11. Hafizzul Majid (Acheh)
12. Hanafiah Ahmad (Norway)
13. Hasan Kumbang (Acheh)
14. Ibnu Hasan Abdullah (Acheh)
15. Ichlas Ramadhan (United States)
16. Inong Zhahir Ramadhani (Acheh)
17. Ishak Beulama (Acheh, Mereuhom Daya)
18. Jaffaniel Alamsyah (Malaysia)
19. Khusairi Ismail (Acheh)
20. Mustafa Krueng (United States)
21. Syahbuddin Rauf (Sweden)
22. Syuhada Linge (Acheh, Linge)
23. Tgk. Lahmuddin Pang Teh (Malaysia)
24. Yusuf Daud (Sweden)
25. Zikrinullah Makarim (Malaysia)